Yeyokuqala ngqa, kodwa umgangatho uyancumisa

Ndimathidala ukubhala lomhlathi, kodwa nanjengomthandi womculo wokholo ndiqonde mandithi gakru isifuba. Kakade ndisakhula kwakuqhele ukuthiwa ‘ngena Xam amanzi uwaqhelile’ nam mandithi gxumpu.

Umfanekise: www.cumbooks.co.za

 

Eyona nto ibindenza madol’ agevegeve yeyokuba uS’fiso ngumpondo zihlanjiwe, akanguye nje omnye wabaduk’ engceni beemvumi abaleqeka nje emva kweqhosha elingenamngxunya. Ndibe ke nam ndisemtsha, ukuba bendiyinjana ngendingekathungululi…!!

Alright, alright enough Christian PR already, duh!!! :D :D

Lomhlathi ujoliswe ekuqhwabelini izandla uNcwane ngomsebenzi omhle awenzileyo-ukhuphe i-DVD eshicilelwe phambi kwababukeli/ abalandeli.

Umgangatho wayo, andifuni nokuthetha intsomi etywaleni, uphezulu ngolona hlobo. Enye yezinto ezibalaseleyo kule-DVD nezindenze ndashiyeka owam ndiwuthe nkebe yeyokuba unazo neetoloki zaba zizimumu (sign language interpreters ngabula makhumsha.)

Xa sithetha ngemvakalo nesingqi, undenza ndishiyeke ndiphelelwe nabubuciko, intle into epha.

Xa ubukele le-DVD uyilibala ‘li’ into yokuba ubukele “umabona-kude” kodwa uzive unge ngathi ukwimvuselelo.

Ubungqina bako konke oku bubonakala ngexesha ehlabela ingoma ekwindawo yesixhenxe nethi ‘Ingakho Ngicula.’ Imbonakalo ebusweni babalandeli yileyo kanye yababona amazulu evulekile.

Ndiyayithanda nendlela acwangcise ngayo iingoma; uvule ngo ‘Halleluja’ noyingoma enqulayo nto leyo elungisa abalandeli, ibafake kumoya wenkonzo. Uthi esakuthi ‘Kulungile Baba’ abatsho abalandeli e-ICC nabagcwalise iholo lema ngesilevu bangazazi nokuba mabathini, befunyenwe yintambiso kaThixo.

Kuba abathandi bomculo wokholo besuka kwiinkalo ngeenkalo, uzame kangangoko anaka ukukhawulelana neemfuno zabo. Ukwenze oko ngokuhlabela iingoma ezifana no-14 (‘You Are Wonderful Jesus’)

Kwindawo yama-14 ucula ethi ‘We Give You All The Praise’. Akakhange kananjalo abavalele ngaphandle oo bhuti noo sisi bethu base-Afrika ngengoma eku-19.

Uyivala inkonzo ngengom zama-Zion nalapho ayitsho indlu yema ngeenyawo.

Kungaphela i-ink ukuba ndingafuna ukuthetha ngolucwambu lwecwecwe. Ofanelwe kukwenza wena kunye; go and get yourself a copy, it’s a decision you’ll never regret for the rest of your life because it’s certainly a ‘must-have.’

 

 

 

 

 

 

 

 

Usizimele qobokazana, kodwa akunani :(

Nanjengomxhasi ozingcayo womculo wokholo, ndibone kufanelekile ukuba ndenze amazwi okuthi ‘ndlela ntle’ kule mvumi ilizwi liqolileyo.

Umfanekiso: www.music4u.co.za

Bekungentseni yangeCawa ngexesha ndifunda umbhalo ku-Facebook, obusibikela ngengozi uNobandla Mangisa nobeneminyaka engama-35 agaxeleke kuyo laze itshoba lalala umbethe.

Ithi ingxelo ebesenza umbuyo kumthandazo obuseGcuwa.

Andizange ndiyikholelwe ncam kwityeli lokuqala ndiyifunda, ndandinga ndiyaphupha, kodwa kwakamsinya ndakhawuleza ndazixelela: ‘Ayilophupha Sihle, yinyaniso, uNobandla usandulele.’

Uyindlavini yesela kanene kufa L.

Bambi banga bayazibuza ukuba bendingumlandeli ongako na, kuba abazange bandiva nangosuku olunye ndikhankanya le mvumi. Bendimthanda kakhulu.

Izizathu ebendimthandela zona zibini; umyalezo kwiingoma zakhe ubungqingqwa yaye ungafihlisi. Okwesibini, ebeyinkosikazi ebilubhentsise elubala uthando lwayo lukaThixo, yaye izenzo zakhe bezibubungqina obungathandabuzekiyo.

Zininzi iingoma esinokumkhumbula ngazo, zezifana no-‘Vul’ indlela sihambe,’ ‘Yhembulali wophelelaphi’ nezinye nje ezininzi.
Unento ebeyithiye kakhulu, well I honestly can’t blame her; ukuthengiswa komculo ezitalatweni.

Ndikhumbula ngonyaka wama-2009 xa wayekwaLanga eshicilela i-DVD yakhe. Wabongoza abalandeli bakhe nababeyindimbane, wathi: “Sanukuwuthenga umculo wethu ezitalatweni. Kuba xa nenza njalo nakusenza sife singenanto babe bona ababantu nithenga kubo behamba ngee Mercedes Benz.”

Xa wayesenza lamazwi acengayo nalumkisayo, ayizange nakanye indithele qatha into yokuba namhlanje angabe kanti ulele ngophotho.

Andinanto ingako ndizakuyitsho ngalenzalelwane yaseTsomo, neshiya ngasemva abantwana abathathu, sele ndifane ndiyengezelisa ndithi: ‘Hamba kakuhle sisi, uyilime wayihlwayela eyakho indima, andisoze ndikulibale.’

Qaqamba Matheba sikujongile

Esinye sezizathu esabangela ukuba ndisungule eliqonga lam yayikukufuna ukufumana ithuba eloneleyo lokuqhwabela izandla oosaziwayo baseMzantsi Africa xa besenza izinto ezinomkhitha, kuba ndiyabathanda.


Bonang Matheba
Umfanekiso: Dstv.com

Namhlanje ilitha lithe ‘tha’ kwintwazana engendala ukuyaphi- nesiyazi sonke, ukuba ebesisidudu ngesingekabinacwambu that’s how young she is…duh!?!

Kwakude kurhatyele ukuba ndikhankanye imisebenzi ayenzayo. Kodwa omenze waduma kukuba ngumbhexeshi wenkqubo yomculo i‘Live’, awayifulathelayo nesele ithiywe okokutsha kwathiwa yi-‘Live Amp.’ Sithetha nje ngoku, ulelinye lamagqiyazana abhexesha inkqubo kamabona kude, edlala ku-SABC3 nebizwa ‘Top Billing’.

 Ndithetha ngoBonang Matheba, 25, notyunjwe njengonomazakuzaku wemveliso yamafutha enwele, nekwasiso nesigcokoshi-mlomo kunye nesiqhunkqisi (make-up), uRevlon. Ezindaba zibhengezwe kwiintsuku ezimbalwa ezidlulileyo. Ndiqonde andinakuphoswa lithula lokuthi, ‘qobokazana’ kulentokazi nethobeke kangaka.

Queen B
Umfanekiso: BonangMatheba.com

Andizokuchitha xesha lide ngokube ndibalula ukuba isikhundla esikumila kunje siqulathe ntoni…I’m not gonna play ‘Mr PR’ for Revlon…hello?!? Look at me! lol Kuba eyona nto indenze ukuba ndidibanise lomhlathi kukuvusisana no’Queen B’ nanjengoko abalandeli bakhe bemkhahlela.

Imbali ithi lentwazana izakuba yeyokuqala ephuma e-Afrika ukuchongelwa esi sikhundla nesizakumxhamlisa amathuba atyebileyo.

Ethetha kudliwano-ndlebe, uBonang uthe nanjengokuba engowokuqala ukuba ngunomazakuzaku ophuma eMzantsi Afrika, kuliwonga elikhulu ukubayinxalenye no-Revlon.

Lo ngumfanekiso wentwazana ekhulele kusapho olungenanto ifana yodwa, nengakhange ibenoloyiko lokuphupha, yiyo nalento amaphupha wayo efezekiseka, de kungathi kwabaninzi yintsomi.

Sithi ‘maz’ enethole’ Matheba, yiphakamise i-flag yoMzantsi izizwe ziwubone.

 

 

 

 

Sithi ‘huntshu’ tat’ uNcwane

Andizokuwenza made nakangako, ndizakuthi gqaba-gqaba ndixel’ umgqakhwe uzinika kwilifa elingelo lawo.

KuMgqibelo odlulileyo, inginginya yoo saziwayo yenze umngcelele osingisela eSun City nalapho bekubanjelwe khona umnyadala wonikezelo wawonga (The 19^th MTN South African Music Awards), award ceremony ngabul’ abayileyo esikolweni.

Thina bathe qelele eRhawutini nabangenazintsiba zakufikelela siye sazitshomanisa noo mabona kude bethu kuba singakufuni ukuphoswa ngulomsitho mhle yaye ubaluleke kangaka kwikhalenda yezomculo kweli loMzantsi Afrika.

Ok, enough PR now... Apho ndiyakhona kusekuqhwabeleni izandla imvumi yomculo wokholo, uS’fiso Ncwane nokudala esemculweni, nokhe wagagana namaqhwa. Kodwa ngenxa yokuba umzingisi engenashwa, xa kunamhlanje uyindumasi.

S'fiso Ncwane
Umfanekiso: google.com

Le mvumi, nedume ngengoma, ‘Kulungile Baba’ izithaphulele iwonga le’Record of The Year.’ Eli wonga lelinye lamakhulu osuku (kunyaka ngamnye.)

Uchulumanco endibenalo xeshikweni eqabela eqongeni eyokwamkela iwonga lakhe belingathetheki, akakhange akwazi nokuphefumla kangako, usuke wadanduluka ngengoma kanye le emenze aphumelele.

Enye yezinto ezindivuyisayo yeyokuba mhla uNcwane wathathela ulawulo lomculo wakhe ezandleni zakhe (wafulathela inkampani nebikade imphethe, Bula music, waqala eyakhe S’fiso Ncwane Music Productions), waze unkosikazi wakhe, u-Ayanda Ncwane wangumphathi wakhe, intsimi yabo yachuma yatsho idiza lazikhwebu ngambini.

S'fiso Ncwane kunye no-Ayanda Ncwane (unkosikazi)
Umfanekiso: TvSA.com

Liyinyani elithi emva kwayo nayiphi na indoda, kukho umfazi engqiyame ngaye.

Ntinga Ncwane unqandwe ziinkwenkwezi ndiyakuvuyela.

UKelly Khumalo unesiphiwo

Kelly Khumalo (phakathi) nabadanisi bakhe
Umboniso: Google

Ibingunyaka wama2004 ukufika kwakhe, wabangela ingxolo kulo lonke eli loMzantsi Afrika. Ingulowo ezibuza, “Uvelaphi ke lo?” Iingoma ‘Qinisela’ no ‘Itshitshi’ zezona zamenza indumasi.

Enye yezinto ezatsala umdla kubathandi bomculo kulentwazana yindlela engaxolisiyo enxiba ngayo nendingasiboniyo isidingo sayo…mhlawumbi ndibomvu.

Indlela anxiba ngayo iquka ukuvelisa isinqe phandle, agqume nje amabele ze ngezantsi afake isijungqe sesikeyiti esinokufaniswa nenkciyo.

Akakabuyi ngamva ekwenzeni njalo, kuba kwiveki ezimbini ezidlulileyo ebecula kwinkqubo kamabona kude, Afro Café nalapho ashiye abaninzi bengonelanga. Kutshintsho lwempahla alenzileyo uye wanxiba ilokhwe nebikhuphe imilenze yakhe phandle yade yaphatse ukuvelisa ubisi lwekati nolukwingobozi…..

Isizathu sokuba ndibhale ngalemvumi nendiyithanda kakhulu kukuba inalento kuthiwa lilizwi- xa icula inalanto ithi “mamela”. Andisazi yaye andisiboni isizathu sokude anqunduze xa ekhwela eqongeni.

Ndikhe kambe ndisive isizathi asoloko esiza naso (nabanye abaculi) xa imibuzo ekumila kwalo ndinawo ivela, sesokuba; “As an artist you must always put on a show that’s full package.”

Lentetho yakhe izama ukuthi ukucula nje kodwa akwanele kodwa nesinxibo sibalulekile. Ndiyavuma kodwa umbuzo wam ngowokuba: Sinyanzeliso sini na esokuba bade banxibe izinquntu zempahla ezide maxesha wambi zivelise okunga kungangaveliswa?

Kelly Khumalo esenza ayenza ngcono-ukucula
Umboniso: Google

Ingaba uKelly uyayidelela italente yakhe netyebe ngoluhlobo?

UGenerations uxhentsa phantsi kwesibane.

Ndingumthandi nomxhasi ongagungqiyo walomdlalo ungentla uphala phambili xa ubani ethetha ngomthamo wababukeli, sukubanika ingqalelo wena aba basoloko bekhwaza ngokungamthandi kodwa bangabokuqala ukuphakela ngokwenzekayo kuye.

Umboniso: Google

 Ukuba ndiphoswe sisiqendu nje esinye kulomdlalo utshotsha phambili ndibangathi ndingumntu onqanqathekayo- ongenalo icuba. Sendide ndamteketisa ngoku, ndimbiza u‘J (G)eneza’.

Emva kwesiqendu ngasinye ndisoloko ndishiyeka ndinochulumanco nobobotheko, lokonwatyiswa kukubona abadlali beqonga endibathandayo besenza abakwenza ngcono- ukubalisa amabali. 

Sesiphi esona sizathu sibangela ukuba ndibhale lomhlathi?Nantsi impendulo;  zikhona nje izinto ezithanda ukundiphazamisa kulomdlalo- iimpazamana ezimana ukuvela, endingayaziyo nokuba zibonwa ndim ndedwa na…

Kuluxanduva lawo nawuphi na umdlalo kamabona kude ukugcina iilwimi zethu nokufundisa abantu ngokubanzi. Ziyandidanisa ke kambe iimpazamo athe gqolo ukuzenza umlinganiswa uNoluntu Memela odlalwa nguZenande Mfenyana xa ethetha, bambi bangazibona zincinci kodwa zinkulu.

Kwisiqendu saphezolo uthe xa ethetha ngonina lume okanye umalume wakhe wathi ngu “Mntakwethu”. Kanti ngaphambili wathi, ekhanyela ukuzithwala kwakhe, “Andikho mithi mna” endaweni ka “Andimithanga mna.”

Zenande Mfenyana
Umboniso: Gallo images

Intsilela iphi? Kumbhali okanye kumdlali weqonga uqobo?

Mzantsi Africa undiphoxile

                                                                     NguSiphesihle Notwabaza

Ndinebhonqo neqhayiya, yaye ndiziva ndithamsanqelekile kukubangummi welizwe uMzantsi Africa. Enye yezinto ezindenza ndizingombe isifuba nesoloko ikhankanywa nangabanye abemi balapha xa bebonga izwe lethu yeyokuba sineendidi ngeendidi zenkcubeko ntoleyo esenza sibenomtsalane kubandwendweli. Xa besityelele (abakhenkethi), bayakhwanqiswa bubuhle bezinto esiye sibaqhayiesele ngazo.

 Xa ndisenza intetho eloluhlobo andikwazi ukushiya ngaphandle into apha endiyithanda ngendlela esisimanga-umculo. Uyinxalenye yenkcubeko yethu kodwa ndithanda ukuwubalula wodwa, kuba awutyebanga koko uyatekelezela. Sinothotho lweemvumi eziphiweyo apha emazwini amnandi. Zezinye zezinto ke ezi ezindenza ndikhukhumale, ndibenamatshamba kukubangummi weli.

Lemiqolo ingengako ndiyenzileyo ngasentla ithetha kamnandi ngelilizwe. Kodwa ndakuba kanti ndinobumenemene ukuba ndiyibalekile inyaniso emsulwa yokuba iziganeko ezithe zagubungela elilizwe kwiminyaka embalwa edlulileyo zibukrwele zabuhluthuluza ubuhle belilizwe. Itshamba liphelile, kushiyeke uloyiko nodano kuphela. Ude ubave besithi abanye, “Andisakuthandi ukuba ngumhlali kwelilizwe, leyokuba uhleli nje unoloyiko.” Andizokube ndichitha ixesha ndidwelisa uluhlu lwezintlekela, nezithe zawushiya uMzantsi Africa ubambe ongezantsi yimpoxeko kuba wonke ubani uyazazi; Anni Dewani, Andries Tatane, Anene Booysen, Reeva Steenkamp nabanye nabanye!!!!!!!!!!!

Eziziganeko zingqinela lantetho ithi ‘Igugu lingabalikhulu umbombo uyaqhosa’. Konke oku kundiphakamisele lemibuzo:

 Mzantsi Afrika kwenze njani? Imoshakele phi lento? Kutheni kwaphalala igazi kangaka? Ingaba selitshonile ilanga ukuba kungalungiswa apho konakele khona?

Andinayo mna impendulo kulemibuzo, mhlawumbi wena unayo.

 Endinokutsho mna kunye, ‘Mzantsi Africa undiphoxile.’

‘Ndalandela ubizo’

                                                                 NguSiphesihle Notwabaza                    

Konke ewayekunqwenela esakhula yayikukufunda ayityekeze; afundele ubongikazi. Kodwa elophupha laphanza ngenxa yokuswela imali yokumthumela esikolweni. Abazali bakhe babengathathi ntweni, uyise, owayefanele ukubayintloko yekhaya- ahoyane neentswelo zabo, wayesela de afincelele- uxanduva lokujongana neemfuno zabo lawela kunina nowayengenamali ingako kwayena. Isisombululo sabasinye kuye; kukwenda. ITreasure ifumene inyhweba yokudlana indlebe nenkosikazi ethi yasinda ekufeni,  xeshikweni yayibanjwe sisifuba, ilele esibhedlele eSomerset. Uthi oogqirha babesele bencamile, kodwa waphaphama emva kokuva ilizwi lisithi, “Uvuswa okokugqibela ngoku, hamba ke uyokusebenzela uYesu ngokwazisa abantu ngaye.”

Asithathanga xesha lingako ukungena kwethu kulelokishi ahlala kuyo, sisuke saya ngqo kwakhe. Iindonga ziqatywe mhlophe naluhlaza (kubhinqiswe ngoluhlaza). Inkosikazi encedisa apha, ekungeneni kwethu emasangweni isamkele yaze yasikhomba kwigumbi elithile nalapho silindele khona esize kuhlinza impuku naye, ebesagqibezela oko ebekwenza Emzuzwini wangena. Unxibe idyasi emhlophe, le kanye inxitywa ngoogqirha. Phambi kokuba asichubele ibali lakhe ukhe wathi cwaka okwethutyana, okomntu ongene nzulu ezingcingeni.

Unkosikazi Leticia Xongwana oneminyaka engamashumi amathandathu (60), ungumseki nomphathi oyintloko weziko elibizwa Laphum’ ilanga Empilisweni Day and Night Care Centre. Iziko eli lisilili kwiinkqubo ezahlukeneyo neziqhutywa apha kulo; kukho igumbi lokuhlala abantu abangooding’ indawo nalibiza iSafety House, kubekho isikolo soonomngqushwana (Crèche), igumbi lokuphekisa (isoup kitchen) nathi aliloncedo nje kubantu abahlala ngaphakathi kodwa kuluntu ngokubanzi. “Baninzi abantu abahlala apha kukho namacoloured nomlungu omnye,” utsho. Kukwakho nenkqubo yomthungo nathi ukukhula kwayo kuyathothoza ngenxa yokunqongophala kwezixhobo (oomatshini bokuthunga) ntoleyo athi ibenza abantu asebenza nabo balifulathele iziko eli. 

Akuphelelanga nje apho kukho negumbi apho kuphululwa imizimba (Massage Centre) kunye neziko-mpilo nathi uncedwa kulo kakhulu liqela lamavolontiya asuka kumbutho TZUCHI Foundation. ITZUCHI liqela lamavolontiya athi amnceda kakhulu yaye uyohlala ewabulela, anikezela nangezitulo zenkonzo. Iseshoni nganye yophululo mzimba iyahlawulelwa, kodwa ixabiso alingako nanjengokuba oku iluphuhliso lokuhlala. Nesebe lophuhliso loluntu uthi likhe lenza untsatha wonikezelo lokutya kunyaka ophelileyo.

Lenzalelwana yaseGugulethu, eKapa, nesele yaqhawukelwayo ngumtshato, ithi yafika kwindawo yaseMfuleni, ekupheleni konyaka wama1994, yamisa isakhiwo (esasingesikhulu, kwenye ingingqi kwalapha aMfuleni) sokukhonzela nanjengoko yabekelwa mhlophe ukuba ubizo lwayo lusekushumayeleni indaba ezilungileyo, yazise abantu ngoYesu. Okwenzekayo kwamkhwankqisa; yena wayecinga ukuba uzakuthandazela abantu baphile, iphelele apho. “Yandixaka ngoku lento yam; abantu beza kum befuna ndibathandazele baphile ndiphinde ndibanike indawo yokuhlala,”utsho esithi oku kwamxakanisa kakhulu kuba wayengenandawo yoneleyo enokude igcine abantu. 

Esaxakiwe yilenyewe yokudinga indawo yokuthandazela, weva ukuba kukho isithuba somhlaba yaye nabani na ofuna ukwakha angayokugxumeka intente yakhe; akazange aphozise maseko wenza njalo. Uthi emva nje kwethutyana efikile, bathontelana abantu ukuza kufuna indawo yokuhla, phofu yena engumthandazeli hayi umgcini bantu. Kukwelolixa kanye apho kwatyaleka imbono engqondweni yakhe yokuba avule eliziko kuba yayingamphati kakuhle into yokubona abantu bengoodinga sithebeni abe engenanto anoyenza ngalonto.

Engazinto ngobhaliso lwaziko, ulwakhiwo laphumelela ngonyaka wama2004, waze walivula, lingabhaliswanga ngokusemthethweni. Kungekudala ilungu elisuka eburhulumenteni lamndwendwela ngelizokuhlala iziko eli. Nangona laphoxekayo nje lakufumanisa ukuba lalingabhaliswanga (iziko) ngokusemthethweni, uthi lachulumanciswa lucoceko elalubonayo laze lamnika umyalelo wokuba abhalise iziko eli ngokusemthethweni, kuba ukwenza njalo kunamaliqi-liqi ako. “Waye wandicebisa ukuba ndiyokubhalisa lendawo ngokusemthethweni,” uyabalisa umama wabantwana ababini, unyana nentombi, uMntuwoxolo Holygate Xongwna (36) noNtomboxolo Veronica Xongwna (32) nothi akazange aphozise maseko wenza njalo. “Emva kokuba ndibhalisiwe ndatsho ndafumana isibonelelo semali engamaR4000 ngenyanga,” utsho. Uthi lemali ayizifezi zonke iingxaki zeziko kodwa ucuntsu akafani nocwaka. Umbane, imali yomnxeba (airtime) kunye nemali yokubuyekeza amavolontiya ancedisayo apha eLaphum’ ilanga zezinye zezinto ekufuneka imali ihlangabezene nazo.

Ebibitheka luvuyo, uyasibalisela ukuba kunyaka ophelileyo iziko lakhe liwelwe ngumqa esandleni: Isigqeba samapolisa esikhululo saseMfuleni samndwendwela saze sanikezela ngoncedo apho lalidingeka khona. “Apheka isidlo sakusasa kunye nesasemini aze andibuza ukuba kokuphi na okunye anondenzela kona ndawacelela ukuba andihlambele iindonga, akwenza oko, ecula kumnandi,” ubalisa atsho, uvuyo lungenakufihlakala. Ukuchontsizela ubusi enkcochoyini; u-SAPS waphinda, emva kokupheka izidlo nokucoca, wenza isinikelo ngeecomputers ezintathu kunye nesizumbulu semali engangamawaka alishumi (R10 000).

Umngeni asajongene nawo ngoku mnye kuphela; kukufumana isiqinisekiso sobunini somhlaba. Uthi oko kungamnceda ukuze akwazi ukucela amalizo koosomashishini nakwimibutho ukuze bamakhele, kuba izakhiwo zakhe zenziwe ngamatyotyombe nto leyo athi ibenza abakhenkethi babemathidala ukwenza uminikelo-mali. “Abakhenkethi abaninzi sebesuka apha banomdla ngumsebenzi endiwenzayo, qha bathi bakubona ukuba ngamatyotyombe bahlehle kuba besithi awakhuselekanga,” utso ebuyengezela. Uthi lonto ibanika ingxaki nakwizigulana ezihlala aph’ eziko kuba kungekho zindlu zangasese, baphele bezicela ukuba zihlale emizini yazo ze yena, negqiza lamavolontiya bamane bezindwendwela.

Unomonde Dlambulo ominyaka engamashumi amane anambini (42) nongumncedisi kwisikolo sabantwana uthi uyakuthanda kakhulu ukusebenza eLaph’ umilanga Crèche. “Ndiyathanda ukubabona (abantwana) bephuhla yaye bonwabile,” itsho lenkosikazi neyaqala ukuncedisa ngonyaka wama2009. Emva kodliwano-ndlebe nolungakhange luthathe xesha lide naye, uyabacela (abantwana) ukuba baculele intatheli, yangathi kuzakuthiwa kuyaqhulwa, bambonzeleka, besitsho ngentsholo eyolisayo; “Sakha itempile, sakha itempile ka bawo.”

Emva kokwenza ukhenketho olufutshane kweliziko sicela indlela, uyasikhulula umam’ uXongwana. Kunye esimnqwenelela kona; yimpumelelo kuko konke akucwangcisileyo. Wanga angangadinwa, aqhubekeke nomsebenzi omhle awenzayo. Ekunyamezeleni ukhona umvuzo.

Inkosikazi isibalisela ngobizo lwayo

                                                                            NguSiphesihle Notwabaza

Kuqala kubemnyama phambi kokuba kukhanye, sakhe satsho esinye isithethi ngenye imini. Lentetho ibonakele ingenakuphikiswa ngexesha lenkosikazi ithwaxwa zindidi zonke zemozulu-ukusuka kumaqhwa, izandyondyo zemvula nditsho neqabaka ebangela igazi libaleke zishiyeke izandla zimhlophe qhwa. Lamaqhwa aquka ukushiywa kwakhe ngumlingani kanye ngexesha awayemdinga ngalo kakhulu. Abantwana engingqini belunyukiswa ukuba bangazibandakanyi nabakhe. Konke oku kungenxa yokuba wamnkela inkolo engaxhaphakanga kwisizwe esintsundu. Konke yena oku wayekubona nje ngezoluleko zokumomeleza ukuze abe ngu-Imaan (umgcini tempile (mosque)) ongenakugungqa. Kakade ukholo ulungenazilingo nazintshutshiso lufile.

KuseMfuleni apha, esinye seziphaluka iKapa eliziqhenyayo ngokusizala. Ilanga lishushu kangangokuba onechem uchengezela ngathi udyibheke iGlecerine. Amaziko okoja inyama adwele okwabaphangeli ekuseni belindele uduladula, abahlali baphithizela okwentwala egezeni. Kukulengingqi kanye apho kuhlala khona umfazi owamnkela inkolo yobuSilamsi (Islam)-sizokudlana naye indlebe.

Emva kwamatyeli amaninzi silahleka kuthe thu umSamariya olungileyo wasikhokela wasibonisa umzi ka Imaan. “Yhe bhuti akuwazi na uMfula, uhlala phi kanti wena?” itsho lenkosikazi isamnkela emzini wayo. Ibe sele isiyalela ukuba masiye kwigumbi elingemva, apho sizakuhlinzela impuku khona. Eligumbi kulapho kanye unqulo lubanjelwa khona (Masjid okanye iMasque ngokwendlela abayibiza ngayo). Ucoceko olulalpha luthi,”suthula, ncoma”. Yona (lenkosikazi) iziqamamngele ngesivatho sesiSilamsi, xa sizazisa kuyo imamele ngononophelo, onode ulibhidanise nolomntu omamele uMantyi- ide inqwale apho kukho imfuneko.

ITreasure ilapha izokubaza iindlebe xa uLulama Imaan Sontsongo ominyaka ingamashumi amane (40) eyichubela ibali lakhe eliquka ukugagana namahla ndinyuka ngexesha esandula kuguqukela ebuSilamsini. Phambi kokuba incoko iqhube uyasitsuphezela; “Ndililungu leqela lamanina kumbutho olawuyalo (African National Congress Women’s League). Ndineminyaka eyileyo pha kwelishumi elinantlanu ndiqhuba.” Uthi wayengumabizwa asabele xa kuthethwa ngezopolitiko ngexesha wayesenza amabanga aphakamileyo. Nto leyo eyakhokelela ekubeni azuze ubulungu kumbhutho omele amalungelo abafundi (Congress of South African Students (COSAS)). Kodwa eyonanto anomdla wokusibalisela ngayo yinkolo yakhe.

Linyathelo (utshintsho lwenkolo) elingaqhelekanga eli, kakhulu kwisizwe esintsudu, umdla esinawo wokwazi isizeka bani sokuze azibandakanye nalenkolo mkhulu kakhulu. “Kwakungekho lula tu mntasekhaya anduxoka,” ugqabaza atsho. Uthi akazange ayicinge into yokuba angazibona sele eliMuslim, into athi wayeyonyanya kakhulu. Ukwamnkela khwakhe lenkolo akuzange kube kukuzikhethela-kwabasemva kokuba wayethanda ukuba namaphupha nathi wayengawaqondi ukuba ayethetha ntoni ngeloxesha.

Esalibele kukunkaniza njalo, engafuni kuyamkela lenkolo; ngonyaka wama2004 walizwa ngamawele (azizini ezahlukeneyo) kodwa ngelishwa eli liyinkwenkwe laqhuzuka. Ukufatshaza ityuwa enxebeni; kunyaka olandelayo umyeni wakhe waxhwila liXhalanga ekuthiwa ukubizwa kukufa. Yimeko leyo athi yamshiya omelwe ngumqa ezamisweni; abantwana wayezakubondla ngantoni? Uthi wayengenayo tu kwaphela impendulo kulombuzo.

“Esaphila umyeni wam ndandithanda ukuba namaphupha, kulamaphupha kwakubangathi ndikwindlu ezele ngamaMuslim, kubengathi ndinxibe ezilokhwe zawo zinde,” uyabalisa.“Bendifudula ndingumama webhatyi kwenye inkonzo (iTreasure iyayazi le nkonzo) yaye ndiyonyanya kakhulu inkolo yobuSilamsi ndizixelela into yokuba andisoze ndiguqukele kuyo,” utsho u-Imaan noyinzalelwane yasePort Allfred kwiphondo leMpuma Koloni.

“Ngaminazana ithile ndafumana isimemo kumntu othile, endimemela kwiMasque elapha ngenzantsi. Esithi lomntu zonke ezingxaki zam zizakusombululeka ukuba ndithe ndaya khona,” utsho. “Ndaqonda ukuba mandiye nje, ndingamdanisi umntu wabantu-kodwa ndisazi ukuba andisoze ndibeLisilamsi mna,” uyabalisa. Uthi esakungena ngaphakathi wabona awayengakulindelanga. “Zonke ezizinto ndandisoloko ndizibona kulaamaphupha wam zazipha kulaMasque,” utsho. Uthi wavakala ezibuza; ‘ifuna ukuba yintoni ke ngoku le?’ Emva kwalondibano kanye, wathatha isigqibo sokuba ave isiziba ngodondolo; wamkela inkolo yesiSilamsi. Uthi ngokwenza njalo yabangathi udilize indlu yoonomeva okanye urholotshe ingqweje yenomi; abahlali bayintw’ ibila ukumbukula oku. Besenza nje konke okungcungcuthekisa umphefumlo wakhe-kodwa wazingisa, kakade umzingisi akanashwa.

Uqhuba ngelithi ukunyamezela kwakhe kwazisa umvuzo; kungekudala nje emva kokuguquka kwakhe izinto zatshintsha, umngeni owawusele mnye yayiyindawo ephangaleleyo yokuqhubela unqulo. Kodwa ukuzila nemithandazo emithathu (3Ragads) yamvunisa iziqhamo ezichumileyo.

“Ndaxelelwa ukuba ukuze izinto zakho zihambe kakuhle, kwi-Islam kufuneka wenze imithanadazo emihlanu, nam ndamana ndisenza njalo. Tyhini izinto zatshintsha noko ngoku,” itsho inkosikazi engumama wabantwana ababini. Uthi iqela lesibini sele lisifumene isipho-mali sokufunda (iBursary ke ngelasemzini). Esisipho siphuma eGate’s Ville-sinika ithuba kubantwana lokufunda e-Islamia, nalapho athi abonwabe abantwana yehaa!

“Abaantwana bonwabe kakhulu, banikwa yonke into-fele-fele,” uqhayisa atsho, ethetha ngabantwana athi bahlala e-Ottery nathi baphila ubom obuntofontofo.

Akalibelanga kananjalo ukudlulisa umyalezo wombulelo koosomashishini basekuhlaleni (amaSomaliya) nathi inkxaso yabo iyamangalisa. Uthi benza umnikelo ngezinto zokupheka ezifana ne-soup nesonka, ze enze isidlwana, alungiselele abantwana nabathi xa bebuya esikolweni badlule kwakhe bafumane okuya ethunjini. Uthi konke ke oku kumakhele iwonga kunye nesidima ekuhlaleni. “Ndatsho ndaziwa mntak’ abawo ukuba ndingumntu,” utsho ‘umama kaBobo’ nanjengoko ebizwa ngolohlobo engingqini.

Xa kanye siwufulathela umzi wayo le nkosikazi, umfoti uyayicela kuba iphumele phandle nalapho kuzakuthathelwa khona imifanekiso, engabonakalisi noluncinci uphawu lokukriniza, wenza njalo. Kungu“danya-danya” no“xhakra-xhakra,” umfoti ubile ulithontsi uthabatha imifanekiso, bayaphuma abahlali ukuza kuzityebisela amehlo koku kwenzekayo-nababonakala bengakuqhelanga noko. Sicela indlela, usikhulula ngobubele aze kananjalo asinqwenelele uhambo olukhuselekileyo.